المقادير : انا بالخبرة عيني ميزاني و لكن لما جربوها للمرة الأولى لازم تكيلو و من بعد رايحين تتعلموها راهي جدا سهلة وسريعة  و ترجع عينكم ميزانكم  ، شوفو :
* كاس و نصف سكر 
* كاس و نصف كريم فراش و اللي ما عندهاش ممكن حليب فايض مسبقا و سخوووووون ، تتحصلي على نفس النتيجة ( ممكن كمية الحليب تكون أقل أو أكثر حسب الذوق ، تحبيها خفيفة أو ثقيلة و حسب الاستعمال ، يعني لما تستعمليها للمثلجات لازم تكون خفيفة وإذااستعملتيها لتغليف كيكة لازم ثقيلة )
* 3 ملاعق كبيرة زبدة
سهولة الوصفة تكمن في أن المقادير حتى وإن لم تكن دقيقة تصلح وما تفسدش

الطريقة :
1- ذوبي الزبدة ، ثم أضيفي السكر و خليه يذوب حتى يصبح كاراميل 
هنا راهو بدأ يذوب على الحواف 

إضغط هنا لرؤية الصورة بحجمها الطبيعي.

هنا ذاب أكثر ، وبدأت الزبدة تنفصل عن السكر ( يعني الزبدة تطفو فوق السكر ) ، ما تخافوش هنا لازم تبداو تحركو بالمضرب اليدوي

إضغط هنا لرؤية الصورة بحجمها الطبيعي.

بمجرد ما تحركو رايح يذوب السكر بسرعة ، شوفو :

إضغط هنا لرؤية الصورة بحجمها الطبيعي.

لما يذوب السكر تماما ، نضيف الحليب قليلا قليلا( لازم يكون سخووون ) و نخلط بالمضرب اليدوي بسرعة ، الحليب يضاف على دفعات كل مرة نسكب حوالي فنجان و حذاري تتحرقو لأنه يفور و يعمل فقاعات ، شوفو هنا لما سكبت الحليب :

إضغط هنا لرؤية الصورة بحجمها الطبيعي.

هنا لما كملت كل الحليب و حركت ، شوفو اللون و القوام ثقيل :

إضغط هنا لرؤية الصورة بحجمها الطبيعي.

هنا راهو بارد :

إضغط هنا لرؤية الصورة بحجمها الطبيعي.

هذه صلصة التوفي بكل بساطة ، عندها طعم الكاراميل و لكن لينة لتستعمليها في عدة وصفات ، مثلا :
* الشكلاطة المحشية لأم رامي 
* بديل النستلي كاراميل في كل الوصفات
* تزيين كيكة
* تزيين المثلجات 
* ممكن ديريها ثقيلة و تعمليها على شكل حلوة bonbon و تغلفيها ، الأولاد يفرحو بيها 
الإضافة السرية نتاعي اللي نوريهالكم غير ليكم ، أضفت حوالي 4 أو 5 حبات شكلاطة و الطعم نتاعها يصبح روووعة ، نفس طعم و ريحة الكابريس ، شوفو :

إضغط هنا لرؤية الصورة بحجمها الطبيعي.

ممكن تبان خفيفة لما تكون سخونة لكن لما تبرد حطوها في الثلاجة على الأقل 3 ساعات ، رايحة ترجع ثقييييلة .
* نصائح :
- حضريها ليلة قبل الاستعمال ، باش تكون بردت مليح و تبانلك الكثافة نتاعها ، ممكن لما تكون مازالت جديدة تتخدعي فيها تبانلك جارية لكن لما تبرد لمدة تعرفي الكثافة الحقيقية 
- استعملي إناء عميق باش لما تضيفي الحليب و يفور ما تتحرقيش 
- إذا جاتك الصلصة ثقيلة بزاف سخنيها شوية و زيديلها شوية حليب
- ما تستعمليش حليب بارد ، ممكن يروب لما تحطيه على السكر سخون و يدير كتل 
- ماتقويش النار رايح يتحرق السكر ومن بعد تقولولي جانا فيها ريحة وطعم الحريق وطعم مر ، مالازمش يتحرق الكاراميل.
- هذه المقادير تغلف حوالي 2 كيكات ، أنا ما جيت نصورها كلاو أخواتي نصها ، لأن طعمها تماما مثل كابريس ذايب 
و في المستقبل بإذن الله نحطلكم الكثير من الوصفات الرائعة بهذه الصلصة البسيطة 
أسمحولي كثرت التفاصيل والصور باش تفهمو مليييح .